За денешниот преглед во петок собравме супер четива. Ставам рака на срце, четивата се многу интересни, едукативни и корисни.
FaceApp реагираше на грижите за приватноста
FaceApp, апликацијата која користи AI технологија за едитирање селфиња, доживеа уште еден бран на популарност изминативе недели, а со тоа и контроверзни прашања во однос на приватноста при користење на апликацијата. На кратко, се паничеше дека руски стартап позади апликацијата ги зачувува сликите од корисниците без да ги извести за истото.
Грижа се јави и кај корисниците на апликацијата на iOS (iPhone). Тие тврдеа дека и покрај тоа што не ѝ дозволиле на апликацијата да има пристап до нивната галерија, тие сепак можеле да селектираат слика и да ја прикачат на апликацијата. Испадна дека ова е дозволено “однесување” на iOS, односно дека корисниците може да ѝ забранат пристап до личната галерија на апликацијата, но сепак можат да селектираат слики и да ги прикачат, доколку сакаат.
FaceApp потврди дека процесирањето неопходно за апликацијата да функционира се прави во cloud, каде се зачувуваат сликите. Во cloud се чуваат само оние слики кои се селектирани за едитување и нема докази дека апликацијата има пристап до целата галерија. Повеќето слики се бришат од серверот во рок од 48 часа, а корисниците можат сами да побараат нивните податоци да бидат избришани.
Google Chrome ќе ја подобри приватноста во Incognito Mode
Вчера Google потврди во блог пост дека ќе ja оневозможи API функцијата преку која е можно да се детектира кога корисниците користат Incognito Mode на Chrome. Оваа промена се очекуваше неколку месеци порано, но ќе стапи во сила на 30 јули.
Сопствениците на веб страници кои имаат т.н „meterin” модел на наплаќање, не се баш среќни од овој апдејт. За појаснување тоа е системот каде имаш право како корисник да прегледаш бесплатно одреден број текстови во ограничен период и потоа мора да платиш. Тие досега го користеа овој „пропуст” на Chrome за да и понатаму ги ограничуваат корисниците да прегледуваат содржина. Сега тоа нема да е можно и ќе мора да размилуваат да се префрлат на т.н “hard paywall”. Со други зборови, ќе нема бесплатна содржина. А тоа ќе доведе до фрустрација кај корисниците, креирајќи лошо корисничко искуство.
Instagram воведе ново предупредување за акаунти што се на граница да бидат банирани
Instagram зазема поактивна улога во отстранувањето на акаунти со анти-социјално и загрижувачко однесување преку воведување на нови алатки и прикривање на лајкови на постови. Најново, воведе предупредување за акаунти кои се на граница да бидат банирани од платформата.
Оваа опција ќе овозможи поголем простор за превземање мерки против акаунтите кои постојано ги прекршуваат правилата за користење на платформата. Тие ќе имаат еден вид на досие, што дури и во случај да ги тргнат објавите кои не ги почитуваат правилата, ќе служи како доказ за историјата на прекршоци на самиот акаунт.
New York Public Library направи дел од светски познатите новели достапни на Instagram Story
Минатата година, во август, New York Public Library нè запозна со едно сосема поинакво искуство при читање книги. Заедно со агенцијата Mother New York, NYPL направи дел од светски познатите новели достапни за читање во формат за Instagram Story на нивниот профил.
Insta Novels опфаќаат четири познати книги: Alice’s Adventures in Wonderland by Lewis Carroll, The Yellow Wallpaper од Charlotte Perkins Gilman, Metamorphosis од Franz Kafka и A Christmas Carol од Charles Dickens. Адаптирана беше и поемата The Raven на Edgar Allan Poe.
Проектот “Insta Novels” донесе неочекувано добри резултати, како за NYPL така и за светот на дигиталната литература. Базата на Instagram следбеници на NYPL се зголеми за 155,000 за една година или отприлика 75%. Од лани до сега, новелите се прочитани повеќе од 300,000 пати.
SHARE фондацијата од Србија соопшти: Twitter назначи претставник за Србија
Новиот Закон за заштита на личните податоци во соседна Србија ги обврзува сите големи (глобални) IT компании да именуваат претставник во Србија кој ќе им одговара на граѓаните на прашања поврзани со личните податоци на интернет. SHARE фондацијата пред неколку месеци упати писма до повеќе светски познати компании, меѓу кои Google, Facebook и Twitter. Тwitter прв одговори дека ќе започне со процесот за именување на претставник во Србија.
Истата обврска ја имаат и сите компании кои нудат слични производи и услуги на територија на Србија. Бидејќи и Google, Facebook, Netflix и други глобални IT компании обработуваат лични податоци на граѓаните на Србија, имаат обврска да одредат домашен претставник, објаснува фондацијата.
Новиот Закон за заштита на личните податоци во Србија стапува во сила на 21 август, а преставниците на фондацијата се надеваат дека до тогаш ќе добијат одговори и од други IT компании чија дејност е опфатена со Законот.
Запознај се со новиот Twitter.com
После месеци тестирање, новиот дизајн на Twitter за десктоп пристигна. Еве што е ново:
- Менито е релоцирано од горниот десен дел хоризонтално во горе лево вертикално.
- Explore, Bookmarks и Lists имаат приоритет кај менито, а ДМ има свој посебен простор.
- Два типа на dark mode.
За жал сè уште нема “edit” на твитови. Дизајнот се чекаше долго, но донесе многу малку во однос на нови функции. Се чини само дека корисниците што ја користат десктоп верзијата сега имаат чувство како да се на мобилната апликација. Кое е твоето мислење? 🙂
Кинески драми снимени за гледање на мобилен во вертикален формат
Последно за денешниот #ПрегледВоПеток, кинески продуценти снимија драми во вертикален формат, наменети за гледање на мобилен. Кинескиот гигант Tencent прв експериментираше со овој формат во 2018 кога продуцираше две кратки серии. Она што е интересно кај драмите во вертикален формат е дека се креирани специјално за гледање на мобилен. Тоа е евидентно во три работи кои се заеднички за сите серии направени до сега.
Многу кратки епизоди
Една епизода трае обично помеѓу две и пет минути. Напишани се така што да ја изнесат поентата на епизодата најбрзо што може.
Вертикалниот формат се третира како жанр
Поголемиот дел вертикални драми до сега се комедии. Добри се за интензивни, брзи и лични моменти.
Поделен визуелен јазик
Комбинација на поделени екрани, свајпови и исечоци доминира во визуелниот јазик кај вертикалните драми. Овој стил одговара на кратките епизоди и брзиот комичен ритам на сериите.
Бонус линкови
- Amazon is now the world’s most valuable brand
- Netflix is losing beloved shows, subscribers, and confidence
- Product views in ‘Stranger Things’ valued at $15M, study says
- Unilever chief Alan Jope: the marketers of the future will be specialists
- Is app apathy hurting your marketing strategy?
Овде е крајот на денешниот преглед во петок. Ако имаш линк или стрип што сакаш да го споделиме во следниот преглед слободно пиши ни порака на Фејсбук. Наместо Marketoonist, денес решивме да споделиме интересен стрип за data science.
До следниот преглед во петок! 😉
