Posts by Наталија Стефановска

115 #ПрегледВоПеток

Мене ми се падна последниот #ПрегледВоПеток годинава и не сум нешто фасцинарана за тоа, зошто ми изгледа како преодговорна обврска. Ама ајде да не се возбудуваме толку и да не го правиме многу голема работа, а? 🙂

Имаме супер линкови за неделава, не многу креативни ама сериозни и поучни! Да ја завршиме годинава конечно, и да не се повтори нели!

Oдговорот на Google на тужбата за Google Search

Во #ПрегледВоПеток 114 пишавме дека се здружија 35 држави да го тужат Google. Google уште истиот ден по тужбата за дизајнот на Google Search објави одговор и објаснување за истиот. Од компанијата велат дека тужбата сугерира да не се работи на подобрување на пребарувањето и тоа да биде помалку кориснo за оние што пребаруваат. Оваа тужба се обидува да го редизајнира „Google Search“ на начин на кој ќе ги лиши Американците од корисни информации и ќе им наштети на бизнисите да се поврзат директно со клиенти. И ако јас избирам од пред и потоа, ќе го изберам токму ова што Google го вели:

Нашето ригорозно тестирање ни кажува дека далеку ги претпочитате резултатите со богати информации кои вклучуваат мапи, линкови до производи и услуги што можете да ги купите директно, опции за летови и хотели и информации за локалните бизниси, како што се работно време, испорака и сл.

Трендови кои мора да исчезнат во 2021

Кога ќе прочитам ваков наслов знам дека на некој му дошло преку глава и мора да си ја испразни нервозата негде. Па исто како јас да сум го пишувала. На списокот што Уна Костадиновиќ го има срочено би додала обавезно и “Цена/Инбокс”, т.е. wanna-be Facebook продавници што сакаат да продаваат, а да не објавуваат цени, и уште еден цел список од 100тина работи, ама ајде доволно беше негативна годинава па да не ја продлабочувам.

Посебно ми се допадна овa што им го порачува на клиентите:

Niste tabloid. Napravite nešto što je jako dobro, platite plasiranje tog sadržaja i sačekajte da algoritam uradi svoju magiju.

2021 ќе биде златно доба за аудио реклами

New York Times е прилично амбициозен кога станува збор за аудио рекламирање. Нивниот информативен поткаст The Daily двојно ги зголеми преслушувањата оваа година, за сметка на 2019та. Рекламирањето во нивниот поткаст е доста популарно кај брендовите со директна продажба на своите клиенти, а благодарение на склучувањето договор за рекламирање и со луксузните брендови кои претходно се двоумеа дали да пробаат овој формат, 2021 ќе биде златно доба за New York Times и аудио рекламирањето. Оваа година, Times склучи договор за аудио кампањи со 226 брендови. Четири од нив – Beautycounter, Chanel, De Beers Jewellers, The RealReal – се во категоријата на луксузни брендови, а во тек се разговори уште со најмалку три бренда.

„За луксузните клиенти, аудио рекламирањето се однесува на публиката, ексклузивноста и новитетите“, Lisa Howard, SVP of media. „Луксузните брендови го сакаат контекстуалниот аспект“.

29.5 милиони долари за 9 годишниот јутубер Ryan Kaji

Колку од вас си подголтнаа само на насловот? 🙂

Ryan’s World трета година по ред е на врвот на листата јутубери кои што заработиле најмногу.

И ако си помисливте дека штом ова 9 годишно дете може, значи секој може, мнооогу се излажавте. Иако изгледа сѐ толку слатко и едноставно, позади видеата на Ryan се крие профи продукција и посветена маркетинг стратегија, што, ќе претпоставите, не е изведена од дете.

Сите кои сакаат да бидат успешни на YouTube можат да научат многу од каналите кои се на листата, во однос на презентација, употребата на тамбнејл, наслов и должина на видео и многу повеќе. Но, веројатно најголемата лекција што може да се земе од овие sвезди на YouTube е доследноста и конзистентноста.

Светот на Биби на гости во #комкаст

Ако имате деца (а и ако немате) нема шанси да не сте изгледале бар една епизода од Светот на Биби. И не само епизоди, толку многу македонска содржина и посветено креирање на една целосна приказна и маркетинг стратегија.

Цртани, претстави, играчки, сликовници, гостувања, интервјуа и што уште не. Кај мене дома се секојдневие. А еве сега Светот на Биби ни дојде на гости во #комкаст. Преслушајте го разговорот со Јована Аврамовиќ колку многу се работи и што сѐ ново се подготвува во Светот на Биби.

Бонус линкови

Нема да се поздравам во овој пост со годинава, и да ви поскувам желби и честитки. Ќе смислиме нешто поубаво за тој повод. До тогаш уживајте во читањето.

110 #ПрегледВоПеток

Убаво вака ми доаѓа ред да ги заокружувам прегледите, па еве ме после 105ката продолжувам со 110ка како мој втор #ПрегледВоПеток

Почнува период на гужви, период кога брендовите ги фаќа празнична “паника” за нови кампањи. Иако годинава ќе мора да го прифатиме новото нормално празнично расположение, сепак скоро и да сум убедена дека брендовите нема да изостават да направат многу кампањи, и кул и луди работи. Затоа почнувам со една што ме остави со подотворена уста.

Лади си го пивото и гејмај од истиот уред

Ама навистина не знам што да ви кажам за ова. Само ќе ви го пуштам видеово и ако некој некогаш стигне до уредов го чекам да ме викне на пиво.

Иако ваквиве уреди се прават за ограничена и привилигирана група на луѓе (во која секако не спаѓам) се надевам дека мноооогу брендови како Bud Light ќе прават вакви луди работи во иднина.

Плаќај пола провизија на Apple како девелопер

Една мнооогу важна веста: За девелоперите кои заработуваат помалку од 1 милион долари Apple ја намали својата провизија на 15%.

Околу 28 милиони девелопери, или 98% од сите регистрирани девелопери, од 1 јануари ќе си ги намалат своите трошоци кон Apple со преполовена провизија. Досега компанијата им наплаќаше 30%, а отсега секој што ќе заработи помалку од 1 милион долари ќе плаќа 15% провизија. Секој девелопер кој спаѓа во оваа група може да се пријави во новата App Store Small Business Program на Apple за намалена провизија, а доколку во текот на годината пак заработил повеќе од 1 милион долари автоматски ќе му биде наплатена провизија од 30%.

Small businesses are the backbone of our global economy and the beating heart of innovation and opportunity in communities around the world. We’re launching this program to help small business owners write the next chapter of creativity and prosperity on the App Store, and to build the kind of quality apps our customers love.

Tim Cook, Apple’s CEO

За компанијата ова е мала промена на која отпаѓа само 5% од заработката на App Store, но за девелоперите е значајна. Намалувањето се однесува на сите извори на приходи на App Store, од премиум апликации до плаќања во апликациите. 

На колку од вас им прелетаа пеперутки во стомак кога ја прочитаа веста? 🙂

Испраќај пораки што исчезнуваат на Messenger

Некако изгледа им недостасува Snapchat на луѓево, па Facebook решија да ја оживеат оваа функционалност и на Messenger. Новиот “Vanish Mode” ќе ви дозволи да испраќате пораки во редовниот чет прозорец без да мора да отворате скриена конверзација. Само со свајп ап може да ја активирате новата опција и да испраќате пораки кои ќе исчезнат а потоа повторно да се вратите во нормалниот чет.

Она што е важно да се напомене е дека само луѓето со кои сте поврзани можат да ја користат оваа опција со вас во чет. Дополнително, ако некој направи скриншот од четот додека сте во “Vanish Mode” ќе ви стигне нотификација. А ако некој едноставно ја премине границата и ви пишува пораки кои едноставно не сакате да ги добивате и прават да се чувтвувате небезбедно, може да го блокирате и да го пријавите.

Оваа опција е веќе достапна на WhatsApp, сега доаѓа и на Messenger, a Facebook најави дека ќе има и на Instagram, што е логично да се случи заради интеграцијата на сите платформи во една.

Не се сеќавам дали сум била во ситуација да морам да испраќам пораки што исчезнуваат, но верувам дека опцијата ќе си најде примена кај публиката, дали за испраќање на поинтимни пораки, или пак некакви доверливи информации. Ќе ве прашам, колку пораки што подоцна сте сакале да ги снема сте испратиле во животот?

Игнорирај го брифот од клиентот

Еден мудар човек, по име Paul Boag, еднаш рече дека можете и треба да додадете повеќе во некој проект отколку слепо да ги имплементирате идеите на другите луѓе.

Имено, еден од нашите омилени автори и консултанти во својот нов пост објаснува зошто мора да го земете брифот од клиентот со резерва.

Па безмалку секој пат кога ќе добиеме бриф од клиентот остануваме прво збунети, после со милион прашања “го напаѓаме” назад за да стигнеме до идејата која му е во глава и да пробаме да ја разбереме работата што нè чека.

За ваквиот тренд на “неразбирливи, глупави и сиромашни брифови” Paul наведува две причини:

  • Најчесто го пишува некој што нема искуство колку вашето, па брифот излегува само список на функционалности кои клиентот би сакал да ги има, или пак воошто не му ни требаат.
  • Клиентот често не успева да си го дијагностицира проблемот за да изготви бриф според кој ќе му се понуди најдоброто решение.

Во секој случај не секогаш сме во позиција комплетно да ги отфрлиме желбите на клиентот, па дури и кога тој упорно настојува да го следиме напишаниот бриф, можеби и треба да го направиме тоа. Она што се очекува од нас е да да бидеме подготвени да понудиме совет и да имаме мислење како брифот треба да се подобри, преработи или комплетно замени, со што всушност градиме репутација како експерти во полето. Најдобриот начин е да поставувате безброј прашања во врска со нивниот пристап и понудете алтернативи со кои всушност ќе ја достигнете целта на клиентот.

Колку често вие како есперти сте во позиција да се договарате, преговарате и да му негодувате на клиентот за испратениот бриф? Колку често ја добивате “војната” и излегува по ваше? 🙂

Слушни го Иван Ајнштајн во новиот #комкаст

Вчера Дарко го викна Иван Ајнштајн (еден од најпопуларните јутубери кај нас, ако не го знаеш, срам да ти е) да гостува во #комкаст. Уште не стигнав да ги ислушам, ама еве велат дека ептен сериозно муабетеле за YouTube.

Дискутираме за локалната YouTube сцена, за заработката на јутјуберите, за квалитетот на содржината, за глобалните трендови и за уметноста наречена YouTube „едитирање”.

Јас одам сега на слушање, вие може да ми се придружите или прво да си ги дочитате бонус линковите. Се читаме во следниот преглед во петок.

Бонус линкови:

Instagram safety tools

105 #ПрегледВоПеток

Поминати цели 104 петоци и конечно #ПрегледВоПеток тимот да здивне малку и да добие зајакнување :). По добри 4-5 години редно е и јас да се вратам на мојата прва љубов – блогирањето, и да бидам редовно присутна и во вашите петоци.

Неделава не беше многу возбудлива, но сепак има неколку работи кои вреди да се споменат. А бидејќи сите сме опседнати со бројки заради друга причина, ќе го почнам и овој преглед со бројки.

Потрошивме 28 милијарди долари за купување во апликации

Се чини дека пандемијава глобално нè направи побогати кога светот успеа да потроши дури 20% повеќе долари за купување во апликациите во последното тромесечие од годинава :). Во време кога ни е ограничен физичкиот контакт, онлајн контактот и часовите потрошени на апликации се зголемија за 25% само во последните 3 месеци. Според истражувањето на App Annie дури 180 милијарди часови глобално луѓето поминаа користејќи апликации.

Под влијание на Covid19, на светско ниво го забрзавме користењето и трошењето во апликациите за едно 2-3 години според планираното темпо. Ова е златно време за сопствениците на игри затоа што се потрошени над 20 милијарди долари за гејминг апликациите, а до крајот на годината, App Annie предвидува дека мобилните игри ќе ги надминат десктоп игрите за 2,8 пати, а конзолата за 3,1 пати.

За 73% од маркетерите иднината на TikTok ќе ги смени плановите за рекламирање

TikTok успеа да го избегне банот во САД за кратко, ама пак е под закана доколку не постигне договор со Oracle и Wallmart до 12ти ноември. Додека се водат преговорите, маркетерите размислуваат за своите стратегии кои ќе бидат под влијание на овој договор. Според истражувањето кое го спровела онлајн платформата за соработка помеѓу професионалци Vancery, 94% од маркетерите сметаат дека ќе има промени во производите за рекламирање, 75% веруваат дека TikTok корисниците ќе имаат различно однесување при купувањето, а 38% дека ќе мора да има нови производи во рекламирањето.

И ваквите бројки не се зачудувачки ако се земе предвид фактот дека TikTok добива повеќе податоци во минута од која било друга апликација и може да помогне Oracle да стане извор број 1 на податоци за потрошувачите за маркетерите. Овој договор би му дал шанса на TikTok уште повеќе да ја прошири публиката во САД, а маркетерите ќе имаат уште поголема можност да ја пласираат својата понуда до помладата публика која е тешко достапна на останатите канали.

Ќе биде ли YouTube новата најголема шопинг дестинација?

Bloomberg потврди дека Google експериментира со нови карактеристики за YouTube, кои би требало да ја претворат платформата во значајна шопинг дестинација.

Некои од видео креаторите (ограничен број) веќе се дел од овој експеримент и според насоките на Google имаат можност да ги тагираат производите во своите видеа, и тие да се купуваат директно од YouTube. Податоците од овие видеа може да се следат откако прозводите ќе се поврзат со аналитиката на Google и алатките за купување.

Веќе некое време се зборува дека Google тестира начини за интегрирање и со Shopify, дозволувајќи им на некои видео креатори да излистаат дури 12 предмети за продажба под нивните видеа.

Иако Bloomberg тврди дека намалувањето на маркетинг буџетот за време на пандемијата во комбинација со зголемениот интерес за електронска трговија се всушност причините зад ваквите новини, сепак согласни сме дека целта на овој потег во најмала рака е да го трансформира YouTube од рекламен гигант во нов лидер за е-трговија, и да биде сериозна конкуренција на Amazon и Alibaba.

Facebook го обои Messenger

За оние што не забележаа, ако има такви, да ви потенцирам да обрнете внимание на следниот отворен Messenger чет. Уште на сам старт ќе забележите дека синото (еднобојно) лого го заменија со ново, пошарено. Дифолтните бои на четот се исто така сменети, а Facebook додаде и две нови теми, како и нови реакции.

Facebook за оваа промена вели: “Новиот изглед на Messеnger ја одразува иднината на четувањето – подинамичен, позабавен и интегриран начин за дружење со вашите омилени луѓе, на вашите омилени апликации и уреди“.

Medium со (уште едно) ново лого

Си се заиграа Medium со брендирањето па решија по трет пат во 5 години да го сменат дизајнот со нова палета на бои, стил на илустрација и уште едно ново лого.

И покрај тоа што новиот стил на илустрација изгледа елегантно и современо, што совршено ја комуницира целта на страницата како платформа за пишување идеи, новото лого сосема ги збуни корисниците. По играњето со буквата М во претходните 2 наврати, Medium креираше лого со три елипсовидни форми кои донесоа многу конфузија што всушност треба да преставуваат.

Многу од корисниците имаат тешкотија да ја сфатат целта на логото, за што од Medium го дадоа следново објаснување: “Дизајнот беше инспириран од јазикот и типографијата. Роден е од елипсите: интерпункција што претставува незавршена или претстојна мисла, идеја што треба да дојде, што е следно. Токму ова се случува на Medium – секогаш има нова идеја, секогаш повеќе во приказната.“

Ако ме прашувате мене, приказната зад ребрендирањето е супер, а за дизајнот мудро ќе си молчам. Времето ќе покаже дали, и покрај првичната конфузија, новиот дизајн на Medium ќе заврши како успешна целина – само се надевам дека компанијата ќе одлучи да го задржи доволно долго за да можеме да дознаеме.

Бонус линкови

Испадна малку подолго од планираното, ама ајде да повежбаме читање на подолги стази да се подготвиме ако случајно пак не карантиносаат. Е дури тогаш ќе пишувам доооооолги прегледи :).

Сакам балкански онлајн серијали

Нон стоп сум пред екран, ама тоа е лаптоп, таблет или телефон. Не гледам ТВ. Некогаш се наоѓам малце неинформирана, особено кога твитерџиите ќе фатат некоја ТВ тема и цела вечер се зборува само за тоа. Па барам на YouTube за што всушност се муабетело, за да можам да го фатам теркот на тајмлајн.

Е токму заради оваа причина се радувам кога ќе се направи шоу исклучиво на Интернет (не дека тоа ми е професија, ама ај сега се правам дека е лично задоволство :). Прво ептен се радував на #SamoKazem онлајн серијал за млади и ептен ми е криво што нема втора сезона. Проектот имаше за цел да ги спои младите од регионот кои делат исти ставови и сништа без разлика на националноста и мајчиниот јазик. Исто им даде платформа на сите млади да си кажат што ги мачи, што ги нервира, што ги радува и се тоа само на Интернет, за да се сфати дека младите од целиот регион можат да се спојат на интернет во своите желби, надежи, проблеми, и сништа. Целиот проект ми беше така фино освежување и многу ме нарадува.

Сега, повторно од Србија ни доаѓа друг проект, онлајн серијал, реално веб шоу за модни блогерки „WannaBe Blogger“. Иако на сосема различна тема, пак му се радувам, затоа што ова има за цел да обучи и насочи 10 млади девојки со сосема различен карактер и стил како и да ја информира и едуцира јавноста за модниот блог како професија и како бизнис. Знаеме дека во Србија модните блогерки и тоа како заработуваат од своите блогови. Од ова шоу треба да произлезат уште нови 10 едуцирани модни блогерки кои пишувањето свој блог за мода треба да им биде професија за заработка. Целиот проект го спроведува WannaBe Magazin, најпопуларниот веб магазин за мода и лајфстајл.

За проектов јас дознав од постот на нашиот драг пријател Милоје. И покрај различните коментари, јас апсолутно се согласувам со фактот дека ваквиот проект значи зајакнување на блогерската сцена со професионалното блогирање.

Кај нас не се појавило ниту еден сличен серијал и јас навистина сакам да видам еден. Било каков, на било која тема, со јасна цел и јасна порака, без разлика дали тоа е спојување на младите на интернет, блогирање или сосема нешто трето. Јас ќе бидам најголемиот фан на овој серијал, ветувам 🙂

А вие ако сакате да следите дали нешто добро ќе излезе од риалити шоуто “WannaBe Blogger” првата епизода е веќе излезена.

@banekoma за #МаратонТранспаренти на #smdaymk

Го најавивме како омилениот дизајнер на сите твитерџии кој е неизоставен дел од акциите организирани на нет и офлајн, а неговата презентацијата беше оценета како најдобра од многу присутни.

Continue reading

Како се прави вирална кампања (на балкански терен)

Вчера следев во живо како најновата кампања на „Југословенско драмско позориште“ се шири како зараза по Facebook, за само неколку минути. Кампањата е врв сама по себе, и мислам дека заслужува уште поголема видливост и внимание од она што до сега го постигна. Кој не ја погледнал, одма да ги изгледа сите видеа.

 

Прво ја видов кај нашиот пријател Иван Чошиќ на Facebook, набрзо скоро сите пријатели кои ги имам од Србија, па и Црна Гора и Босна и Херцеговина ја имаа споделено кампањата.

Ivan Cosic - jdp

Кај Исток Павловиќ уште посилен ефект.

Istok Pavlovic

Најсвежа наша вирална кампања беше тизерот на ОНЕ оператор за новата понуда „Распеани од добра понуда“. Иако сосема друго сценарио и чекори, сепак тизерот беше бум, пуштен во вистински момент кога на пазарот беа актуелни некои жешки теми за пензионерите и ЈСП. Овој тизер ги поттикна луѓето емотивно да реагираат и да не бидат свесни до последен момент дека се работи за кампања!

Нема да ги анализирам продукциските способности и сценариото на кампањата за  „Југословенско драмско позориште“, но мора да се задржам на идејата и начинот на реализација. Кога една компанија/агенција креира кампања, во последно време омилена желба им е да стане вирална. Ако си агенциски човек не може да не си го добил ова барање од бренд „Ама кампањава да биде вирална“. Е па седнете, изгледајте ги сите видеа проследете како се ширеа на Facebook, и учете како се прави вирална кампања. Неколку поенти тука мора да истакнат и да станат јасни и за брендовите и за агенциите:

  1. Не секоја кампања може да стане вирална!!!
  2. За да стане вирална кампањата треба да се има оваа цел на ум уште на самиот зачеток и првично планирање на истата!
  3. Кампањата мора да има оригинална и автентична содржина и да ги искористи актуелните случувања, трендови и емотивна состојба на мнозинствотот на пазарот за да стане вирална!
  4. Кампањата мора да има поддршка од онлајн заедницата (содржината да поттикне дел од „влијателните“ корисници да ја споделат први, брендот/агенцијата да им даде екслузива за споделување на кампањата па ако треба и да им плати)
  5. Не секој корисник може да поттикне кампањата да се шири, да стане вирална (и највлијателниот во моментот ако искрено не верува во вредноста на кампањата и не се соживее со содржината нема да поттикне виралност на истата и за сите пари на светот)

Претпоставувам дека дел од луѓето кои ја споделија први имале дојава/договор за споделување на кампањата иако немам (се уште) потврдена информација. Ако претпоставката ми се покаже за неточна, ќе бидам пресреќна. Но и да е точна, секоја чест McCann Erickson Beograd, генијална идеја и реализација. Веќе почна и на нашиот пазар да се шири и да добива пофалби.

Мојата дилема за Facebook новостите

Јас и Facebook… Тоа ти е како договорен брак во кој веројатно ни двете страни не се сакаат, ама ете мораат да бидат заедно. Од време на време си праќаат по некој шармерски поглед ама со многу краткотрајна вредност.

Не, нема да ви раскажувам приказни за мојата „љубов“ со Facebook иако многу често ме инспирира и книга да напишам. Еве на пример пред 3 дена реши дека ќе ни пушти нов дизајн на Facebook Pages Manager.

Прво се изнервирав дека така од никаде ми се појави новата верзија, ама си реков ајде не плачи одма сигурно е подобра. Башка луѓето си најавиле, ама јас сум ја испуштила нивната најава. За дизајн најчесто не коментирам (не знам, не сум компетентна, се лутат дизајнери и слично) ама овој вака на прв поглед изгледа навистина скоцкано и ми се допадна.

Тоа траеше точно две минути, додека не стигна првата нотификација на некоја од страниците кои ги администирам. И на крај сфатив дека за било која активност во новата верзија имаш минимум 1 клик плус од претходно. Ми се врати истото чувство како кога преминував од iOS на Android. Не беше многу тежок преминот, ама за да искористиш што повеќе од оперативниот имаш многу повеќе работа од претходно. Исто и за ова нема да се распишувам на долго и на широко затоа што не се сметам за компетентна, ама крајниот заклучок за двата оперативни ми е дека iOS го креира твоето корисничко искуство и те води низ процесот на работа, додека на Android сам си го креираш корисничкото искуство и процесот на работа, што за мене не беше баш подобрата опција зошто бараше многу повеќе време.

Е така ми е и со новава верзија на Facebook Pages Manager. Facebook напишал неколку бенефити:

  • Easier access to admin tools
  • Quicker navigation to Page Activity and Insights
  • More direct access to an “action bar” that lets you quickly write a post, add a photo, edit your Page and more

NewPagesManager

Нова распореденост, попрегледна… Тоа е првиот впечаток. Но, едно големо НО… ти троши многу повеќе време внатре. И тука почнавме да размислуваме со Дарко за неколку дилеми:

  • Дали всушност Facebook навистина прави надоградување при секоја нова верзија?
  • Дали новите верзии се само за да те држи буден дека постојано се работи, се менува, и се случува нешто многу важно внатре?
  • Дали е неопходно да ја имаш секоја нова верзија?
  • Дали новите верзии ти го прават животот (под живот во мојата глава стои: работата) полесен?

Не сум сигурна дека имам одговори на овие прашања, особено не вистинските. Знам дека постов нема и некоја голема вредност и порака, ама ете го размислував и Дарко ме поттикна да ги ставам мислите на блог. Можеби ќе му се зголеми вредноста ако ги споделите и своите дилеми со мене :). Ги чекам вашите размислувања.

Кои се локалните брендови кои инвестираат во квалитетна содржина

Кај нас има брендови кои се трудат да го одржат пазарот со инвестирање во содржина и да направат разлика и истакнување над стандардните Facebook финти.

Continue reading

Зошто никогаш нема да активирам Reply на Фејсбук

Повеќе од година имаме шанса да (не) уживаме во вгнездените дискусии на Фејсбук. На почетокот се потрудив и јас да уживам во оваа нова опција но набрзо сфатив дека само си ја усложнувам работата.

Главната причина заради која користењето на овааа опција ми ја правеше работата посложена беше тоа што не е овозможена во мобилната апликација и во Facebook Pages. Истата причина подоцна ми послужи и како совршен изговор пред клиенти и пред било кој што ќе ме прашаше зошто на нашите страници не е активирана оваа опција. И се уште овој изговор ми врши работа бидејќи околу 50-60% од работата ја завршувам преку мобилен телефон или таблет, а за викенди овој процент е и до 100% :-). Па кога од мобилен уред се вклучуваш во дискусија, хронологијата на веб е тотално измешана и нелогична. Затоа Reply опцијата е исклучена на сите наши страници.

Но како што изгледаат работите наскоро ќе мора да го вадам од ракав и вториот изговор заради кој одбивам да ја активирам опцијата, бидејќи Фејсбук веќе ја активираше во мобилната апликација за iOS, па очекувам многу наскоро да ја има и на Андроид.

Она што навистина не ми се допаѓа е што вгнездените дискусии бараат клик повеќе за да ги видиш комплетно. За среќа или несреќа, најчесто се соочувам со потребата да водам дискусии за кои е многу важно за брендот корисниците да имаат увид во целата дискусија уште на прва рака.
Пример кога одреден корисник ќе го нападне брендот, брендот е во ситуација да одговори на нападот и да ја изведе ситуацијата во позитива. Со активирана Reply опција, од целата оваа дискусија на прва рака се гледа само првиот коментар, т.е. нападот, а за останатото треба клик повеќе. Знаеме дека корисниците стануваат многу помрзливи со напливот на информации ретко ќе го направат тој клик повеќе за да ја видат целата дискусија.

И ова не се однесува само за дискусија предизвикана од негативен коментар. Истото го мислам и за било кое прашање, или позитивен коментар.
facebook-replies
Е па можеби и не ви држат вода моиве причини, ама за мене тие се доволни за никогаш да не активирам Reply копче на Фејсбук страница.

На вашите страници активирано е? Како се справувате со работење од мобилен уред? Или пак не работите со мобилните апликации?

#ОнаКога ќе потфрлиш на Твитер

Деновиве читав за масивниот ненамерен fail на @USAirways и одлична приказна испадна на крај со скроз неочекуван завршеток. Па затоа решив и јас да ја пишам во пост, покрај многуте напишани на истата тема.

За оние кои не се запознаени, накратко случајот е следен: во обид да се одговори на негативна критика на Твитер, US Airways направија нешто скандалозно,  шокантно и како сакате наречете го, ги заслужува сите вакви епитети. Клиентка им се пожалила на услугата, а тие во супер љубезниот и културен одговор (NSFW) вклучија и вулгарна фотка на темата која навистина ги шокираше сите.
US-Airways-Tweet
Подоцна нели следуваше извинување, па правдање, барање изговори и слично.

Твитот беше избришан после цел еден час, но како што и многу пати сме повториле,  интернет памти сѐ, па штетата е веќе направена.

Она што мене ме изненади тука е што реално овој твит не предизвика некои екстра осудувачки критики. Да многу медиуми пренесоа за истиот, но без осуда, критика или цврст негативен став за истиот. Нормално, ставот и критиката сами си ја градиме и содржината и тежината на твитот не изоставуваат осуда од страна на читателот, но она што подоцна се случи уште повеќе придонесе целиот случај да биде неверојатно изненадувачки.

Впрочем оваа постапка беше без апсолутно никакви последици врз работно место на одговорната за овој твит. Нивното објаснување беше уште позачудувачко. Одлуката предизвика многу измешани емоции кај мене. Од една страна потајно можеби се соживеав со улогата дека на секого може да му се случи истотото, а да бидеме реални во нашава професија и многу лесно се греши а грешките нема шанси барем еден да не нѝ ги начека и да ги прошири. Ми олесна дека ете US Airways пресметале дека овој настан не е кобен за нивната репутација и личноста која е одговорна за истиот многу повеќе придонела отколку што грешела. Од друга страна сметам дека ова е непростлива грешка и целиот резултат од случајот ги изместува границите на тоа што е дозволено и што не е дозволено, и што треба да очекуваат корисниците од комуникацијата на брендовите онлајн. Да, знам дека претерувам малку, но самиот случај е екстремен па и јас одам во екстреми.

Како и за секој екстремен настан на социјалните медиуми, без разлика дали е позитивен или негативен, брилијантните интернет тролови си ја завршија работата со свои реакции по повод твитот на US Airways. Mashable издвои 38 бесценети реакции кои мора да ги прочитате 🙂

И тука се прашувам дали овој твит ќе биде “секое чудо за три дена” и ќе се најде нешто ново на кое ќе се посвети целото интернет внимание, или пак токму тие три дена си ја изиграа улогата и оваа грешка ќе им се одрази негативно, можеби не директно, но индиректно.  Дали корисниците сега би очекувале многу попретпазлива и попосветена комуникација од страна на US Airways, или пак ќе си ја искористат шансата во иднина да ја исмеваат целата комуникацијата за сметка на оваа грешка? Колку пати треба да се згреши за да сфатат брендовите кои се границите и принципите на квалитетна и професионална комуникација на интернет?

Раскажи приказна – Gary Vaynerchuk

Gary е еден од оние кои можам да ги слушам по 100 пати секој ден, како ми го раскажуваат истото и пак да го премотам назад уште еднаш и уште еднаш и уште еднаш. И видеово подолу во постов го преслушав 4 и пол пати од вчера до денес и негде на пола од петтиот пат решив дека мора да го ставам во пост.
Има толку силни поенти, онакви кои ќе ги слушнеш ќе си помислиш „е добро де го знаев ова, ништо ново не кажа“ а после ти се врти во глава непрестајно секоја реченица која ја потенцира во неговото излагање. Gary е еден од оние кои има моќ да ти каже колку е глупаво и безвредно тоа што го работиш и тоа да те испирира да направиш нешто многу помоќно, наместо да те навреди! Толку трезвено анализира што точно се случува на пазарот и колку во пракса не се спроведува теоријата и обратно!

Во видеото потенцира колку е важна приказната на брендот, на кампањата и на секоја микро активност. И ќе извлечам само пар поенти кои треба да ги имате во глава и кои јас треба да ги имам во глава, а останатото ќе ве оставам да го преслушате.

  • Што и да работите во животот, секогаш вашата главна работа е да ја раскажете вашата приказна! Ние сме луѓе и треба да се однесуваме на човечки начин, а приказната е онаа кое го буди човечкото во нас.
  • Времето ни е најважниот фактор и сакаме другите луѓе да го почитуваат како што и ние треба да го почитуваме нивното, затоа добрата приказна која не го окупира и троши залудно туѓото време е најважна!
  • Денес, скоро сите луѓе, бизниси, организации ја раскажуваат својата приказна како што требало да ја раскажуваат во 2007 а не во 2014 година. Последните 70 години живеевме во време на филмови и документарци чии приказните не тераа да размислуваме длабоко, а денес живееме во време на ударни и вонредни вести, па треба и нашата приказна да ја адаптираме на новото време.
  • Квалитетното раскажување на приказна секогаш победува.

Кога се ова ќе го ставите во рамките на нашава професија, посветете особено внимание на она што се зборува по 8мата минута во видеото! И да, сите компании и агенции го знаат тоа, но колку се применува?

А мене ова ми е најомилениот дел од целото видео:
„Marketers ruined everything!!! As something new comes out, we are trying to figure it out and we ruin the old one!“

Поубавата страна на Твитер

Нема да пишувам каков бил Твитер порано, колку бил добар и поубав и поинформативен и колку подобро го користеле старите генерации. Иако се согласувам во голема мерка со тоа и ја чувтвувам истата носталгија понекогаш како онаа опишана во постот на @ribaro, но како што и сама кажав новите генерации се се побројни и си имаат свој начин на користење на Твитер.

И нема да зборувам за разликите помеѓу прва, втора, трета итн. Твитер генерација, зошто ми е тотално нонсенс и неблагодарно да плукаш по нечиј начин на функционарање правејќи го твојот подобар. Твитер многу се измени од времето кога ние, околу 50тина луѓе ја пронајдовме мрежата и бевме жедни за нешто ново. Ние го користевме на свој начин, по нас дојдоа уште 100тина други кои донесоа друга свежина и други насоки, по нив дојдоа уште десетици други кои си донесоа свој начин на употреба. И без разлика дали Твитер се користи на овој или на оној начин едно нешто остана константно: Твитерџиите се жедни и секогаш подготвени да помогнат некому.  Кога го пишав насловот на постот, мислев токму на ова.

Низ времето видовме многу акции, кои сите одлично ги знаетe и секогаш ќе се споменуваат: #протестирам, #елкамк, #топлина, #солидарност итн, итн… Овие денови актуелна е #крводарители.

Втора крводарителска акција на Твитер заедницата

Утрово ги слушав на радио и ми се бендиса муабетот за минатогодишната акција за дарување крв каде се појавиле 102 крводарители, од кој 75 биле прифатени. Според лична проценка на @IceManAndov (еден од организаторите), минимум 50 од овие луѓе биле Твитерџии. И освен што ова навистина е за восхитување, јас ќе ја анализирам овогодинешната акција од друга страна: колку е клучен Твитер за организирање на една ваква акција. Секако не го запоставувам и Фејсбук бидејќи како што @ivogievski рече: На Твитер информацијата побрзо се шири, на Фејсбук подолго трае. И вистина се согласувам со муабетот.  Деновиве сме сведоци дека ги има и по ТВ, радио, печатени медиуми, но акцијата тргна од Твитер, се шири на Твитер и од тука се пренесува и по други канали. Малку да го изразиме тоа во бројки. Организаторите на акцијата направија посебен Твитер профил @krvodariteli

@krvodariteli

До сега има само 293 следбеници, но според time.mk досегнал до 30959 корисници кои time.mk ги следи во својата база. Според бесплатната алатка за статистики tweetreach последните 50 твита од последните 17 часа поврзани со #крводарители даваат уште поимпресивни бројки.

#Крводарители  TweetReach

Секако тука голема улога си има и „популарноста“ на Твитерџиите кои се организатори на настанот @ivogievski, @IceManAndov и @IrenaMila и придонесуваат за поголем досег на кампањата.

Исто не е за потценување и Фејсбук, со кој преку креирање на настан акцијата во моментов стигнала до повеќе од 7000 луѓе кои се директно поканети. Од нив 278 веќе кликнале Join што значи сите нивни пријатели ја добиле оваа информација на нивниот ѕид. Ако го земеме предвид фактот дека просечниот македонски корисник на Фејсбук има помеѓу 200 и 300 пријатели, значи настанот достигнал до најмалку 55600 корисници. Ако ги земеме предвид и другите објави во електронските медиуми овој број ќе стане уште поголем.

И ако само 1% од оние до кои досегнала акцијата се појават и даруваат крв, за мене е повеќе од успешна. Но за тоа, потоа ќе дискутираме. Сега може само да препорачаме да ја поддржите акцијата и секој кој се чувствува подготвен да дарува крв. Особено се поттикнати оние со негативен Rh-фактор.

1911899_10152100974162054_817884673_n

А сите заедно може да помогнеме оваа акција да досегне до уште повеќе луѓе, едноставно со споделување преку нашите профили на Интернет.

Кога selfie-то ќе добие поинаква вредност

Ellen DeGeneres направи selfie кое ќе влезе во историјата. Го твитна, и направи историја за Твитер, за Оскари и секако за целата филозoфија на selfie-то како такво.

Овој твит веќе секаде прочитавте дека е најретвитаниот. За само пар минути освои 100000 ретвити, го сруши рекордот на Обама и Твитер падна (нормално, како и при секоја ваква гооооолема активност).

Ако анализираме, немаше што да се изгуби тука:

1. Имаш трендинг настан
2. Имаш топ селебритис на сликата
3. Имаш супер паметен хумор во самиот твит

Твитот е предодреден да биде вирален. И стана највиралниот во историјата.

Е сега има и една друга страна која мора да се спомене тука. Не толку скриената порака зад оваа планирана активност е дека сликата е направена со Samsung Galaxy Note 3. Oва би требало да е историски момент и за Samsung ако не излезеше веста дека Ellen на сцена користи Samsung, а зад сцена iPhone.

Ellen.Oscars.2014.iPhone

Тука се прашувам до каде оди лојалноста кон одреден бренд. Присуството на Samsung на оскарите беше over the top, и повторно не успеа да ја земе сета слава за себе. Дури станува „предмет на исмевање“ од страна на Apple Insider кој се врати наназад да ги анализира и другите настани каде Samsung e спонзор и каде им се случила токму истата идентична работа со Franz Beckenbauer, или и кога John Legere го направи истото, или кога David Ferrer твитна колку многу го сака Samsung Galaxy S4, погодувате нели, од неговиот iPhone. Или најсвежо пред Оскари, кога Samsung побара од олимпијците да го покријат логото на своите iPhone телефони.

Колку се овие моменти планирани, намерни, наместени или едноставно спонтани? Колку ваквите моменти имаат врзани последици, позитивни или негативни, за брендот, за актерите во самиот настан, за учеството на еден бренд во вакви настани во иднина? Колку ваквите моменти ги менуваат стратегиите, одлуките, и пред се претпазливоста и свесноста на брендовите за ваквите моменти? Баш сакам да видам една добра издржана дискусија на темава.

На крајот да останам во духот со Оскарите нели, и она што мене професионално (а и лично) ме интересира повеќе од тоа кој бил номиниран и добил Оскар, Твитер извади статистика и најдобри моменти од тоа како поминаа #Oscars на Twitter и како помина Twitter со #Oscars, секако со фокус на Ellen. Сите детали на https://blog.twitter.com/2014/looking-back-at-the-2014-oscars-on-twitter

 

Ние на #blogomanija

На тема „Првиот Инстаграм фото-конкурс во регионот“ Дарко зборуваше за нашите познати #letogram и #zimogram на #blogomanija.

Continue reading